Segun trahador Gloria Ras:

GERENCIA DI “THE ARUBA RESORTS” NO TIN RESPET PA SU TRAHADORNAN! 

ORANJESTAD (AAN) – Señora Gloria Ras, di departamento Housekeeping, a relata pa prensa kico nan como trahador, ta pasando den The Aruban Resorts, cu ya caba tin tres luna ta atrasa nan pago di salario.

El a comenta cu e trahadornan ta worde intimida y bisa cu si nan yega laat nan por worde kita di trabao, pero mientras tanto nan no tin mas un plan di pension pasobra e resort tin cuatro aña sin paga e compania di seguro den cual tabata tin un fondo pa esaki. Tampoco nan tin un seguro di bida na cual nan tin derecho, tampoco e instancia ta paga belasting.

El a acentua cu nan ta pidi respet di e trahadornan pero nan mes no ta duna nan e respet cu nan merece, locual e trahadornan ta pidiendo tambe.

“Nos ta berdad trahadornan gewoon di housekeeping, pero nos merece respet como persona. Si bo kier pa mi rindi pa bo, duna mi mi placa na tempo, pasobra bo no por bin bisa mi –bo ta bay cobra dia 31 cu ta dialuna, siendo cu awor no tin placa- con bo ta bay buske pa pone diabierna pa ta na banco dia 31? Bo no por, no bin gaña, ban papia cla ban papia serio. Si bon pensa di bay bancarota ban awor y no lague pa duna mi Pasco di bancarota, please!” sra. Ras a remarca.

El a sigui bisa cu tur e trahadornan tin yiu, famia y responsabilidad, y el a agrega cu e mes turistanan ta ripara cu e servicio no ta cien porciento.

“Nos no tin material pa traha. Cu smile so nos no por convence e guest. Un turista no ta worde convenci cu un sonrisa. Wel, esey ta e problema!” sra. Ras a señala.

El a subraya cu unico cu falta ta pa gerencia kita for di e trahadornan e cuminda di merdia, y esey nan ta wardando tambe pa sosode, pasobra nan ta kere cu esey ta yegando caba, pasobra aworaki nan ta duna nan mitad cuminda.

“Nan no por bisa cu nan ta duna nos un cuminda drechi. Pasobra un cuminda pa un trahador di ocho ora den housekeeping, cu ta haci diez camber, ta dos cuchara di aroz cu dos cuchara di carni stoba. No tin salada, no tin juice. Bebe awa cu ta mas saludable”, Gloria Ras a señala y su demas coleganan a mustra cu e ta papiando e cosnan manera nan ta.

Back