Confirma!

ARUBA TIN 7 CASO DI GRIEP DI PORCO 

ORANJESTAD (AAN):  Dia 15 juni ultimo Departamento di Salud Publico (DESPA) a ricibi un notificacion di casonan sospechoso a base di informacion cu hungadornan di volleyball di Aruba tabata den contacto cu e team di Surnam cu a test positivo pa e virus di Influenza A H1/N1.

   For di e momento ey DESPA a cuminsa cu e investigacionnan necesario pa haya mas dato posibel for di e team di volleyball di Aruba y nan contactonan mas cerca, pues esnan na nan cas.

   Te awor e resultado di e investigacion ta mustra cu Aruba tin un total di 7 caso confirma cu e virus di Influenza A H1/N1. Tur e casonan aki di un of otro manera ta relaciona cu otro. Manera ta conosi caba, pa por contagia cu e virus aki bo mester ta den un distancia di menos cu 1 meter di un persona contagia pa bo por haya e virus aki.

Peliger di Influenza A H1/N1

Actualmente e situacion no ta un alarmante pasobra e virus ta manifestando su mes hopi suave, manera un griep normal comun.

E peliger di e griep aki ta cerca personanan cu ta sufri di malesanan cronico manera: - Astma, patient cu Chronic Obstructive Pulmonary Disease (COPD), persona cu problemanan cu nan sistema imunologico (cancer, HIV, malesa autoimunologico), persona diabetico y cu ta sufri di curason of problema cu adernan.

Pero tambe muchanan chikito y muchanan cu ta sufri di astma, alergia y cu tin otro tipo di malesanan cronico respiratorio. Esakinan nos ta yama e grupo di riesgo. Cerca personanan cu ta sufri di un di malesanan cronico aki e virus lo por manifesta su mes severo, hasta por haya complicacionnan. Tur docter di cas, sala di emergencia y specialista mester tene cuenta cu esaki na momento cu un pashent presenta cu e simptomanan di problema respiratorio.

  Pesey Departamento di Salud Publico (DESPA) ta pone enfasis ariba e parti di vacuna e personanan di riesgo. E vacuna no ta esun contra e virus nobo Influenza A H1/N1 pero tin componentenan parecido na esaki cu si bo haya e Influenza virus A H1/N1 nobo e lo manifesta su mes na un manera leve.

   Pa sigui mantene  control ariba e situacion na Aruba, ta sigui cu e surveillance. Investigacionnan di contacto ta sigui di parti di Departamento di Salud Publico (DESPA). Asina ta haya un bista ariba henter e situacion aki na Aruba. Ta sigui tuma muestra di casonan sospechoso cu ta presenta nan mes na Diagnostic Center Influenza y esakinan ta worde manda Hulanda pa confirmacion. Segun protocolnan di DESPA.

Pa evita di haya e virus nobo Influenza A H1/N1 bo por evita di ta den vecindario di personanan cu ta presenta symptoma di griep, si no por evita esaki, laba man frecuentemente cu habon disinfectante.

Evita pa nister of tosa ariba otro, usa un lenso di papel cu por worde benta afor. Purba di no mishi cu bo wowo, nanishi, ni boca. Asina e transmision ta menos efectivo pa e virus di Influenza A H1/N1.
 

Back