CANDELA NA NG’S  SUPERMARKET,  DOS PERSONA A RESULTA HERIDA!

ORANJESTAD (AAN)—Matutino DIARIO a entrevista seņor Shair Tromp, Oficial di Cuerpo di Bombero, cu tabata na warda ora cu a surgi un candela na NG’S Supermarket na Noord, cu a causa dos persona herida.

Shair Tromp a menciona cu e candela mester a cuminza banda di e edificio unda cu airconan ta, door di e materialnan cu tin warda eynan y paden e candela a plama hopi lihe, y a bay un tiki paden.

Segun Oficial Tromp tin entendi tabata tin bastante cliente den e supermercado y cu despues di a pasa den un tiki panico nan a logra sali bay pafo. E unidad di Brandweer a tarda pasobra nan tabata bezig cu otro candela causa den yerba, y nan a laga esaki para pa atende e candela aki.

Un total di tres unidad a worde saca di cual e personal di tur tres pero e material di un so a worde uza pa ataca e candela aki.

Na yegada Brandweer a confronta cu hopi problema cu e doņo di e supermercado y e trahadornan, segun Oficial Tromp a duna di conoce. Esaki pasobra den nan panico pa nan scapa nan negoshi a stroba e trabao di Bombero.

Esaki pasobra nan tabata ranca e slang y bomberonan mester a paga tino no solamente riba e candela pero tambe riba kico e personanan aki tabata haci. Un persona, probablemente trahador di e supermercado a resulta herida, unda el a kima su braza, posiblemente den su intento pa paga e candela. Pero segun informacion cu DIARIO tin ta dos persona a resulta herida.

Tromp a indica cu mesora nan a yama ambulance pa trata e persona (nan) concerni.Gran parti di e candela a keda pafo, pero el a menaza paden y cuminza coi e dak tambe den e di dos piso di e edificio.

Seņor Tromp a indica cu semper nan ta purba controla e mapanan ora cu edificionan asina ta worde traha y despues, ora cu e construccion ta caba nan ta controla, ademas cu nan ta haci control regularmente. Pero semper ta keda cu e doņo ta responsable pa su lugar. Den e caso aki tur cos ta apunta cu e candela ta relaciona cu un problema cu airco.

Back