Segun Andy Lee, INGRESONAN DI PAIS ARUBA A CAY, PERO GOBIERNO NO TA HASI NADA PA STIMULA ECONOMIA 

ORANJESTAD(AAN): Durante conferencia di prensa di e partido berde Dialuna, Parlamentario Andy Lee a trece dilanti cu cifranan disponibel pa loke ta economia di Aruba ta duna partido AVP un preocupacion hopi grandi, pa loke ta e situacion economico di nos pais.

Segun Lee, e cifranan disponibel di belasting cu ta mustra e ingresonan cu belasting ta ricibi for di empresanan, e consumidornan etc., como tambe e cifranan di hotelnan, ta preocupante.

Pa loke ta loonbelasting pa luna di Mei, tin un caida di 23%, cu ta nifica un caida di 4,7 miyon di florin den un solo luna.Esey ta nifica pues cu tin un caida basta significante den cuponan di trabao.

Si nos wak e cifra di e periodo di Januari te cu Mei, nos ta ripara cu e caida ta 12% cu ta 3 miyon florin, compara cu mesun periodo aña pasa.

E cifranan aki ta cana consistente cu AOV cu tambe ta basa riba e suma di ‘loon’ cu ta wordo paga y e ta cana consistentemente tambe cu AZV cu tambe ta basa riba e suma di ‘loon’,

AZV a cay cu 23% y AOV a cay cu 14%, cu ta caidanan consistente di Januari bin ariba.Otro preocupacion cu e partido berde ta mira ta e caida den BBO.

BBO ta un indicacion di kico e consumo ta na Aruba y aki nos ta mira un caida di 13% den luna di Mei, loke ta nifica un caida di 1,9 miyon florin den e luna ey so.Si bo coi di Januari te Mei, bo ta haya un caida di 4,8 miyon.Esaki ta nifica 7% di caida.

Invoerrechten tambe ta mustra un caida di 23% den luna di Mei, cu ta nifica 9,3 miyon di Januari pa Mei.

Pa loke ta e cifranan di BBO y invoerrechten aki, esaki ta nifica cu e caida ta indica un caida den consumo y den export di servicio pa turismo.

Tur esaki ta duna e indicacion cu negoshinan no ta bay asina bon cu nan por a sigui paga e mesun cantidad di placa na salario, mientras cu e consumo di local y turista no ta saca mesun hopi cu tabata saca prome.

Pa loke ta turismo, e asina yama ‘Revenue per Available Room’ den luna di Maart a cay cu casi 18%.

Loke e Revenue per Available Room ta bisa ta cu un camber normalmente ta trece cierto cantidad di placa pa dia si e ta ocupa of no.

Awor esaki a bira 18% menos pa camber, cu ta un indicacion fuerte cu e venta di servicio turistico di e hotelnan no ta cana mesun bon.

Na momento cu menos turista bin of nan ta gasta menos, bo tin cu baha bo prijsnan di camber.Loke ta pasa e ora ey ta cu e rendimento pa camber ta bahando.Lee a sigui bisa cu 18% ta hopi placa.

Mirando tur esaki por bisa cu tin un recesion economico na Aruba, pero lamentablemente no tin cifranan disponibel pa indica esaki.

E recesion aki ta debi na cierto factornan interno y externo.E factornan interno a cuminza for di basta tempo caba.

Un di e componentenan importante pa e factornan interno aki ta e maneho presupuestario cu Gobierno a bin ta hibando.Esaki ta crea ‘deficit’, cu ta deficit pa consumo di Gobierno y no pa inversion.

Esakinan mester wordo financia na di cierto manera.Con Gobierno a hasi esaki?Dos aña pasa Gobierno a aumenta invoerrechten y a introduci un BBO tambe.Tur esaki ta hisa bo costo di operacion di negoshi.

Esaki ta e maneho economico fiscal cu Gobierno ta hibando, cu no ta un maneho consistente cu ta concorda cu un maneho pa stimula economia.

Parlamentario Lee a sigui bisa cu ora cu bo hisa e prijs di operacion di e negoshinan, automaticamente bo tin cu pasa e aumentonan aki den e prijs final pa e consumidor.Costo di bida e ora ey ta subi y hendenan ta consumi menos.

Pa turistanan tin alternativanan den nos region y asina pues nos por perde turista, door di no ta hopi competitivo mas.

Un otro factor interno ta cu e maneho economico no ta den man di e Minister di Economia, pero mas bien e ta wordo dirigi pa e Minister di Infrastructura cu ta determina unda ta pone edificionan nobo y unda ta pone ‘malls’ nobo, cu ta un indicacion di e direccion den cual nos economia ta bay.

E planificacion ta hopi malo y no tin ningun tipo di palabracion cu e ‘stakeholders’.E stakeholders no ta wordo involucra y den situacionnan economico negativo, ta e stakeholders pues e negoshinan y e consumidornan ta sinti esaki.Gobierno no ta delibera pa wak for di unda e problema ta bin, pa busca solucion.

Loke ta hasi tur cos peor ta e aumento drastico den petroleo, awa y coriente, ta hasi cu costo di operacion ta sigui subi y entrada disponibel di hogarnan ta bira menos pasobra.

Hendenan door di esaki tin menos placa pa consumo.Gobierno no ta hasi nada pa stimula economia y e no ta sinta cu gremionan tampoco.

Back