EMISORA DI RADIO A YAMA HENDE BAY WARDA DI POLIS ORA PERSONA AFILIA NA PARTIDO A WORDE DETENI NA SANTA CRUZ

ORANJESTAD (AAN): Durante un entrevista a puntra Alto Comisario Peter de Witte tocante e hecho cu na dado momento e parada di AVP a worde desvia Diadomingo.

Segun de Witte, esey tabata pa e parada su fluho sigui bon y esey ta un procedura normal.

DIARIO a puntra de Witte tambe si el a ripara presencia di Comision di Bon Boluntad y el a bisa cu  mirando cu e comision ta esun cu ta vigila tambe si cos ta cana bon pa loke ta e diferente partidonan, e ta asumi cu nan lo a wak e parada aki di cerca.

De Witte a splica cu Comisario Dolfi Richardson tabata encarga Diadomingo cu orden publico y seguridad hunto cu inspector Croes y nan a haci un bon trabao.

DIARIO a puntra e Alto Comisario si na dado momento a yama pa refuerzo y el a bisa cu mirando e emocionnan halto na dado momento, a tuma algun medida di precaucion, pero afortunadamente no tabata necesario pa tuma mas medida.

DIARIO a puntra tambe loke a sosode despues cu dos persona a worde deteni na Santa Cruz door cu nan tabata bringa cu otro.

El a splica cu ora cu e personanan a worde deteni, atravez di un emisora di radio tabata worde bisa pa tur hende bay warda di polis pa sostene e hendenan aki of pa yuda nan sali back.

Afortunadamente e hendenan no a laga nan emocionnan domina nan y tur cos a worde soluciona na bon manera.

Despues cu polis a laga e personanan bay, nan a papia cu e hendenan y a pidi pa esaki no sosode mas.

Back