Ta djis pasobra famia Croes ta biba na Santa Cruz:

CARETERA DI SANTA CRUZ TA HAYA CAPA DI ASFALT PERO SMITH BOULEVARD KETO BAY TA YEN DI BURACO! 

ORANJESTAD (AAN) – Varios hende ta reaccionando pasobra nan ta nota cu tur aña gobierno ta laga pasa un capa di asfalt na e caretera di Santa Cruz unda cu famia Croes ta biba, pero tin otro camindanan prioritario cu ta worde completamente neglisha.

Un ehemplo ta e caminda riba Smith Boulevard for di Rotonde Las Americas bin abao. Si bo pasa net dilanti di strand hotel, por mira con e caminda ta zak (ta bay abao) y tin yen di buraco cu ta causa flat tayer den hopi auto, incluso e busnan grandi di Arubus ta zona masha mahos ora nan tin cu pasa riba e buraconan cu tin y no solamente akinan pero den henter e trayecto cu ta bin for di e luznan di trafico na haltura di aeropuerto bin abao.

Con ta posible cu henter e pueblo di Aruba ta paga hopi na belasting, pero gobierno ta laga drecha camindanan cu ta keda cerca di e vivienda di politiconan of otronan cu ta dentro di e circuito di “friends & family”.

Un bon infrastructura di caminda ta un derecho di henter nos poblacion. Y e caminda di Boulevard ta un di esnan di mas transita cu tin rond di Aruba, y e cantidad di buraconan aki ta hacie hasta peligroso.

Esun di Santa Cruz si constantemente ta worde drecha, buraconan ta ser tapa, capa di asfalt ta bin regularmente, pero e resto di nos distritonan tin cu sigui sufri, pasobra no tin famia Croes ta biba eynan? Esaki ta un reaccion cu a bin for di pueblo mes y e ta refleha e cansancio cu hopi hende tin di e mesun sistema di gobernacion cu MEP ta ehecuta pa añanan largo y riba cual sigur no tin cambio!

Back