Cifranan ta mustra cu Nilo Swaen a gaña! 

POR A PAGA PERSONAL GOBIERNO INDEXERING!

*Personal a costa 40 Miyon menos cu den rapport Mehran
*Manipulacion cu placa di pueblo a coba graf 

ORANJESTAD(AAN)—Cantidad di cifranan Nilo Swaen a presenta pa splica cu e no por coba graf di Aruba door di duna empleadonan di Gobierno indexering. 

Cifranan ta mustra cu Nilo ta gaña. Ora pone cifranan di rapport Mehran, cu mester a drecha e situacion financiero di Aruba, banda di e gastonan real cu Gobierno tabata tin cu personal na 2007, ta nota cu Gobierno a base di e cifranan di Mehran, por a gasta 40 Miyon mas na personal. Loke si a coba graf di Aruba segun cifranan ta e servicionan y material cu a worde entrega na Gobierno y den esaki mester bay mira cuanto a bay na entre otro gastonan di abogado y di conseheronan!

E rapport di Mehran a worde traha pa guia Aruba segun acuerdo cu Hulanda cu na 2009 lo tin un presupuesto cu falta solamente 25 Miyon pa cera y despues entradanan di Aruba ta cubri su gastonan.

Segun a priminti Hulanda ta bay traha di acuerdo cu e rapport di Mehran. Esey no a socede. Mehran den su rapport a duna diferente posibilidad pa entrada y gastonan di Gobierno y den e situacion di mas malo, e gastonan di personal, segun Mehran lo tabata 570 Miyon aña pasa.

E suma aki no a worde gasta na personal aña pasa. Cifranan di Banco Central, cu por leza den e Government Statistics Digest 2007, ta mustra cu aña pasa Gobierno a paga 530.4 Miyon, cu ta 40 Miyon menos cu Mehran a pone den su rapport na personal.

Esey ta nifica cu Gobierno, si e kier a tene na gastonan cu Mehran a pone den su rapport tabata tin na 2007 40 Miyon mas pa su empleadonan y por a paga indexering!

Nilo Swaen mester papia un idioma cla awor pasobra loke cifranan ta mustra si ta cu Mehran a calcula cu na 2007, servicionan y material pa Gobierno a nifica un gasto total di 164 Miyon. E gastonan real a resulta di ta 23 Miyon mas halto.

Segun informacion, esaki ta e graf di Aruba. E hungamento cu cifranan y e forma cu ta atende cu placa di pueblo. Entre otro, mientras un gasto mester worde haci na cierto aña, ta haci e gasto pero no ta paga mes aña, pero ta lague pa e aña siguiente!

Un prueba ta loke a haci cu docternan. Bisa nan cu ta paga nan loke mester a bin pa 2007, na 2008 y bisa cu ta cubri e interes di docternan mester haci prestamo na banco. Asina e debe ta sigui subi.

Cifranan sinembargo ta mustra cu si a sigui rapport Mehran, personal no a coba graf di Gobierno, pero nan gastonan tabata 40 Miyon menos na 2007 cu Mehran mes a pronostica!

Back